LAITI NINGELIJUA

Siku nikiziringia, na miezi kufatia,

Miaka nikanuia, duniani  nitakaa,

Dakika sikuchukua, ng'ambo nimesharushiwa,

Laiti ningelijua, kuishi kumbe masaa !

Laiti ningelijua, nisingetia udhia,

Roho safi ningekuwa, kila mtu kumwangalia,

Wema ningeunuia, watu wote kugawia,

Laiti ningelijua, kuishi kumbe masaa !

Huruma ningeilea, mayatima kuwalea,

Kama wana wangekuwa, kwa mapenzi kuyanoa,

Ukiwa wasingejua, kama wangu wangekuwa,

Laiti ningelijua, kuishi kumbe masaa !

Fakiri wasingekuwa, wale ninaowajua,

Zaka ngeliwagawia, umaskini kuutoa,

Kisha kuwasaidia, hadi yao yakakua,

Laiti ningelijua, kuishi kumbe masaa !

Ya dini ningeyajua, yake nikapalilia,

Tajiwidi kunuia, mengine nikahofia,

Imani ingenijaa, sio mambo ya ruia,

Laiti ningelijua, kuishi kumbe masaa !

Ujana ningetumia, kwa wengine kuwafaa,

Dini ningejisomea, kihiyo nisingekuwa,

Kiarabu ningejua, na hija nisingeachia,

Laiti ningelijua, kuishi kumbe masaa !

Umri ningeutumia, ibada kujifanzia,

Anasa ningekimbia, pamwe kujitangazia,

Yangu ningeangalia, sabilllahi yakawa,

Laiti ningelijua, kuishi kumbe masaa !

Mali nisingeichezea, kwa fujo kuitumia,

Anisi kusainia, na ukafiri kufaa,

Haki ningepigania, wanyonge kusaidia,

Laiti ningelijua, kuishi kumbe masaa !

Elimu ningeitumia, kwa wengine kugawia,

Mwisho nisingefikia, milango mingi kwingia,

Hadi China kuingia, yao nikajisomea,

Laiti ningelijua, kuishi kumbe masaa !

Afya isingenifaa, pasina wengi kufaa,

Yao nikaangalia, hadi siha wakajawa,

Hapo ningeliridhia, laiti ningelijua,

Laiti ningelijua, kuishi kumbe masaa !