MTANI: Eti tumeendelea... au tunataniana ?

Hebu muogope Mungu

Nafsi yako uiangalie

Uadilifu sio bidhaa,

Na ukweli hauuzwi sokoni

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Iko wapi sindano

Itokayo Tanzania?

Isiwe ni njaa ya kura

Na kiu cha utendaji

Chaanza kukushambulia

Ndio midia unazivamia

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Iko wapi hiyo pasi

Katengeneza Mtanzania?

Sisi watu wa kununua

Na kisha kwenda kutumia

Kigezo kingelikuwa

Si kwendelea ni kusaidiwa:

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Iko wapi pampu ya maji

Kutokea Chuo Kikuu mlimani ?

Yeyote anayetawala

Na kodi akazisimamia

Mapato yote kuingia

Makubwa atajifanyia

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Liko wapi jambo jipya

Si wajibu kuzungumzia ?

Kuongoza ukichaguliwa

Ni kazi kama kuajiriwa

Kuna mambo unatakiwa

Budi hayo yote kutimia

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Umejenga barabara

Mshahara si umelipwa?

Malipo ukipokea

Na kazi isipotimia

Kabdarasi sawa utakuwa

Cha bure umekipokea

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

LIko wapi trekta letu

Wanauliza wakulima ?

Kaangalie Korea na Malaysia

Hata jamaa wa China na India

Huko huko tumeanzia

Sisi nyuma bado twabakia

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Liko wapi gari lal Nyumbu

Limekufa na Nyerere ?

Vijijini twajionea

Ghorofa zinainukia

Ila si aushi zilizokuwa

Za udongo na nyasi ndio paa

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Vijijini nyumba zikiota:

Hapo kweli tutaendelea ?

Umeme kwetu kumi asilimia

Ishirini itakuwa ikiwa mia

Kwa spidi ya luku kutumia

Na wateja  kudharauliwa

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Gizani tusingelikuwa

Vijijini Tanzania ?

UKosefu bado yetu lugha,

Madawati mashuleni kupotea

Watoto chini wanaokaa

Makalio wakayachubua

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Madawati yatushinda

Eti tumeendelea ?

Vyoo kwetu ni udhia

Bahati ukiviambulia

Visafi  tena vilivyokuwa

Hata vinapochafuliwa

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Kuwa hata nacho hicho choo

Kwa wengi ni mtihani

Eti tumeendelea ?

Uzuri wa wanawake vijijini

Tunazidi kuufanya duni

Haki za binadamu wakowapi

Vijijini wanawauliza

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Dhiki, shida vijijini

Wazuri hawaonekani ?

Maji hadithi inayosifiwa

Alfu lela ulela imekua,

Elfu zimekwishatufikia

Elfu kumi tunazingojea

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Maji kuwa kama almasi

Eti tumeendelea ?

Huwezi ukajisifia

Kwa kile kisichotokea

Au kile kinachokuwa

Na watu wakajionea

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Kuendelea kwa tivii

Hayo maendeleo bandia ?

Wabaya wakizaliwa

Siri yao wanaitambua

Nao wanaweza kujisifia,

Na mapambo kujitia

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Kibaya kawaye ni kujitembeza

Kizuri hadhiye kujiuza!

Kale nilikwishawaambia

Maendeleo ya nchi kufafanua

Yataka watu kujitambua

Wengi chini yanawaondoa

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Wengi palepale wakiwa

Mnaweza kuendelea ?

Sera sasa zinazotakiwa

Ni la wengi kuwa na manfufaa

Ukija kulinyanyua pazia

Watu wote watajionea

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Uongozi kalasi vijijini

Itaendelea Tanzania?

Pesa sasa mnazichukua

Vyombo vya habari kumwagia

Hivi mmekwishatembelea,

Huko kulikokuwa na njaa

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Mjini wanazidi kushiba

Vijijini utapiamlo

Hayo ni maendeleo ?

Wanasiasa waliokuwa,

Nani kijijini anayekaaa

Ila fisadi waliojijengea

Makasiri ya maendeleo kuua ?

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Wako wapi viongozi

Wafanyao kazi vijijini?

Tunaifanya sanaa

Dhana hii ya kuendelea

Si upepo inayozawadiwa

Kisha bendera ikapepea

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Vijiji visipoendelea

Haiendelei Tanzania?

Vya msingi vinatakiwa

Na vingine siye kujinyima

Watu wakishajipatia

Tuongeee kuendelea

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Iko wapi sindano

Itokayo Tanzania?

Aibu tunaojitia

Kwa ukweli kuukataa

Kunayo ndogo kweli hatua

Ila bado kabisa hatujaendelea

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Uongo kurudi nyuma

Maendeleo ni ukweli

Haki ndani inapoingia

Watu wote wakajisikia

Na nchi wakajivunia

Na sio laana wanaozitoa

Ewe baba, ewe mama

Ewe kaka, ewe dada

Kaulizie kigezo tumikishi:

Haki isipokuwako

Nani ataendelea?

Sheria zinapochezewa

Na wengine juu yake kuwa

Pakakosekana usawa

Katiba uliyokwiharidhia

Ewe baba, ewe mama

Ewe kaka, ewe dada

Kaulizie kigezo tumikishi:

Bila sauti ya wananchi

Maendeleo sio 'mirage'?

Wote kama watoto tukiwa,

Nyumbani kwa baba na mama twakaa

Kulishwa tunategemea

Na wala sio wa kujitegemea

Ewe baba, ewe mama

Ewe kaka, ewe dada

Kaulizie kigezo tumikishi:

Uhuru wa kiuchumi

Sio mwanzo wa maendeleo?

Vingine inapokuwa

Watu mashaka tutawatia

Akili wakaziwazia

kama sawa zilizokuwa

Ewe baba, ewe mama

Ewe kaka, ewe dada

Kaulizie kigezo tumikishi:

Hili tusipoliangalia

Ukichaa huwa kuendelea!

Moja la kulizingatia

Hususan kwa wote Watanzania

Si watu wanaotuletea

Maendeleo wakajisifia

Ewe baba, ewe mama

Ewe kaka, ewe dada

Kaulizie kigezo tumikishi:

Maendeleo kodi yetu

Kama isipofisadiwa ?

Siasa zilikoingia

Kila kitu zinakichafua

Hata akili waliokuwa

Nao sasa wazainiwa

Ukweli kuukataaa

Mbeleko ya uongo kubeba:

Ewe baba, ewe mama

Ewe kaka, ewe dada

Kaulizie kigezo tumikishi:

Mswahili ninavyomjua

Ukimwambia ameendelea:

Hapo hapo huishia!

Nayakumbuka ya bibiyangu

Daa zamani alipoiingia

Shogaye akamuelezea

Analo shamba lake hilo kubwaaaaaaa...

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Robo eka wala  haikufikia

Wa pwani amekwishaendelea!

Naona ndio tuliojaliwa

Kwa sifa ninazozisikia

Hakuna tena kilichobakia

Ila sasa tuanze kuvitumia:

Ewe babu, ewe bibi

Ewe baba, ewe mama

Ewe kaka, ewe dada

Kaulizie kigezo tumikishi:

Tanzania tumelima robo eka:

Malaysia 'hekta' za kwao ni mia moja:

Ni nani wa kujisifia?